उपमहापौरांच्या कार्यालयात राडा! खुर्च्या उचलून मारहाण; पुणे महापालिकेत दोन गट आमने-सामने

NewsZenn Mar 30, 2026 137 0

पुणे : पुणे महानगरपालिकेत उपमहापौर परशुराम वाडेकर यांच्या कार्यालयातच दोन गटांमध्ये जोरदार वाद होऊन त्याचे रूपांतर थेट हाणामारीत झाल्याची धक्कादायक घटना घडली. या घटनेत कार्यकर्त्यांनी एकमेकांवर खुर्च्या उचलून फेकल्याने महापालिका परिसरात काही काळ तणावाचे वातावरण निर्माण झाले.

मिळालेल्या माहितीनुसार, डॉ. बाबासाहेब आंबेडकर यांच्या १४ एप्रिल जयंतीनिमित्त पुणे रेल्वे स्टेशन परिसरातील पुतळ्याजवळ एकच मुख्य मंडप उभारण्याचा निर्णय महापालिकेने घेतला होता. या निर्णयानंतर परिसरात लावण्यात आलेले विविध संघटनांचे बॅनर व छोटे स्वागत मंडप हटवण्याची कारवाई सुरू करण्यात आली.या कारवाईमुळे ताडीवाला रोड परिसरातील काही कार्यकर्त्यांमध्ये नाराजी निर्माण झाली. संबंधित तक्रार मांडण्यासाठी काही कार्यकर्ते उपमहापौर परशुराम वाडेकर यांच्या दालनात आले होते. यावेळी आंबेडकरवादी कार्यकर्ते आणि इतर कार्यकर्त्यांमध्ये जोरदार शाब्दिक वाद सुरू झाला.

वाद वाढत गेल्याने दोन्ही गट आमने-सामने आले. एका कार्यकर्त्याने ‘तुम्ही येथे वाढीव करायला कशाला आला आहात?’ असा सवाल केल्यानंतर वातावरण अधिकच तापले. पाहता पाहता कार्यकर्त्यांनी खुर्च्या उचलून एकमेकांवर फेकण्यास सुरुवात केली. या गोंधळात एका कार्यकर्त्याला बेदम मारहाण झाल्याची माहिती समोर आली आहे.यानंतर मारहाण झालेल्या गटाने आपल्या सहकाऱ्यांना बोलावून घेत हल्लेखोरांना ताब्यात देण्याची मागणी केली. या घटनेमुळे महापालिका परिसरात तणावपूर्ण वातावरण निर्माण झाले. सुरक्षारक्षकांना तातडीने पाचारण करण्यात आले आणि परिस्थिती नियंत्रणात आणण्याचा प्रयत्न करण्यात आला.

दरम्यान, या घटनेची पोलिसांनी नोंद घेतली असून पुढील तपास सुरू आहे. उपमहापौरांच्या कार्यालयातच अशी हाणामारी झाल्याने महापालिका प्रशासनाच्या सुरक्षेविषयी प्रश्न उपस्थित होत आहेत.

#Pune #PuneMunicipalCorporation #ParshuramWadekar #DrBabasahebAmbedkar #PuneNews #BreakingNews